skip to Main Content

In hierdie episode fokus ek op Andries Brink, stigter van Andile Solutions, waar hulle in banke se unieke tegnologiese behoeftes voorsien van voor tot agter, se besigheid.

Vertel ons bietjie meer omtrent jouself.

Ek het grootgeword in Suid-Afrika. My pa was eers ‘n onderwyser en toe ‘n skoolhoof, so ons het maar agter sy bevordering aan getrek. Sodoende het ek ‘n redelike groot deel van die land gesien; ek het op klein dorpies gebly soos Klawer en Aliwal-Noord, en uiteindelik in Kaapstad beland waar my pa hoof was van Panorama Laerskool. Ek het op Stellenbosch studeer en woon tans in Johannesburg. Ek en my vrou was vir ‘n paar jaar oorsee, maar is nou terug in goeie ou Jo’burg! Tot dusver was my loopbaan  gefokus op wat ek gestudeer het, nogal interessant, spesifiek rondom wiskunde en tegnologie. Stellenbosch het in my tyd ‘n graad aangebied wat begin het met aktuariële wetenskap en ek het toe opgeëindig met ‘n rekenaarwetenskap-agtergrond en dit was eintlik nogal ‘n baie goeie keuse in baie opsigte. Ek dink dis ‘n industrie wat baie gegroei het, met ander woorde, die finansiële tegnologiese aspekte ten opsigte van finansieringsbesluite en so aan. Ek het my loopbaan op daardie fondasies gebou tot waar ek nou is, van waar ek en ‘n paar vennote so agt jaar gelede Andile begin het. En vandag is Andile ‘n lekker groeiende jong maatskappy wat van krag tot krag gaan.

 1. Gee ons ‘n opsomming van die tipe besigheid en industrie?

Ons is by die kapitaalmarkte betrokke, ons is ‘n finansiële professionele dienste firma, wat beteken dat ons hoofsaaklik konsultasiewerk doen waar ons banke en soortgelyke spelers help om stelsels te implementeer, verander, verbeter, en hulle stelsels diens. Ons gebruik basies wiskundige en statistiese analise en ook tegnologie om dit te mee doen. Ons werk met allesomvattende stelsels; dis beheerstelsels vir ‘n bank se hele verhandelingskamer, en as ek sê “verhandeling” bedoel ek álles – van die bemarking van hulle finansiële produkte, die risikobestuur, die verhandeling self, die operasionele bestuur, so van voor tot agter – dis basies die industrie waarop ons fokus.

 2. Watse tipe probleem los jou besigheid op?

Ons los die vraag na kundigheid op. As ek dit  in ‘n enkele sin moet stel; daar is geweldige vaardigheidstekorte in die hele wêreld, dit is nie net ‘n Suid-Afrikaanse probleem nie. Dit is akuut by ons en ook in die res van Afrika. Dit is egter nie net ‘n kundigheidsprobleem nie, dit is ook dat organisasies hulleself struktureer met die soeke na ‘n elastiese tipe kundigheid, met ander woorde, hulle doen ‘n groot projek, maar  wil nie mense aanstel om die projek te doen nie, hulle wil eerder ‘n projekspan inkry.  Ons bied vir hulle daardie kundigheid wat kan inkom en uitgaan oor die tydperk van ‘n projek.

 3. Wat maak jou anders as jou kompetisie?

Ek dink in die Suid-Afrikaanse konteks is ons die enigste Suid-Afrikaanse firma wat doen wat ons doen, so ons het baie internasionale kompetisie. Ek dink ook die feit dat ons Suid-Afrikaans is maak ons anders in die sin dat ons internasionale kwaliteitdienste bied, maar teen Suid-Afrikaanse pryse. Dit is definitief ‘n differensieerder. ‘n Ander ding wat ons laat uitstaan is dat ons risiko neem. Dit beteken ons sê vir die kliënt dit gaan nege maande neem en dit gaan jou R100 kos, en ons gaan dit vir jou doen binne nege maande vir ‘n honderd rand, en dan doen ons dit. Ons onderskryf dit dan deur ons mense sodanig op te lei en aan te wend soos wat ons weet die beste metode is, so ek dink dis ‘n groot onderskeiding. Dis ‘n baie moeilike ding om te voorspel; ons is gewoonlik maar katvoet om te vinnig vaste koste projekte te doen waar ons daardie risiko neem. Ons hou daarvan om dit te doen met kliënte met wie ons al een of twee projekte agter die blad het want dan verstaan ons hulle goed. En dan, nóg belangriker, is dat ons werklik in ons firma investeer en in ons mense. Ons investeer ook in  tegnologie, en ons bou ons eie goed, dis ‘n tweede fase van ons besigheid waarmee ons nou besig is oor die afgelope twee, drie jaar. Dis lang siklusse en dis groot besluite want die goed is maar duur, jy werk met duur tegnologieë, met duur mense, en ‘n ou kan groot foutjies maak. Juis omdat dit so duur is, is nie almal bereid om daardie investering te doen nie, maar ons het so bietjie meer ambisie wat daartoe lei dat ons werklik baie in ons infrastruktuur belê.

 4. Ons weet nou julle teikenmark of ideale kliënt is in die finansiële sektor, maar is daar ander industrieë wat ook aantreklik is?

Ek dink as jy met my praat moet jy besef my maatskappy is besig om ‘n tweede fase van ontwikkeling in te gaan, ek dink na sewe jaar is dit ‘n algemene tendens, want die boeke sê dit behoort te gebeur. Dit maak dit nie makliker of minder interessant as dit gebeur nie, maar ons is definitief besig met daardie tweede fase vir ons. Tradisioneel is ons eerste fase maar rondom die professionele dienste, konsultasiedienste, projekimplementering en so meer, en daar het ons min kliënte, want ons teikenmark is klein, dis baie gefokus, baie gespesialiseerd, en ons soek nooit eintlik ekstra kliënte nie, ons is nie ‘n firma wat vreeslik bemark nie. Ons bemark wel, maar ons bemark deur ons werk, ons het ‘n webwerf, maar ek dink nie ons het al ooit betaal vir ‘n advertensie nie want dis nie hoe die industrie werk nie. Die industrie is absoluut ‘n industrie van vertroue en dis ‘n baie klein industrie, mense praat met mekaar, so jy moet die vertroue opbou in die industrie en dit is dan soort van op die ou end die bemarking. Die tipe diens wat ons bied is nie effens nie, dis nie ‘n kommoditeitstipe diens nie, daar is altyd iets anders, daar is altyd nuanses en verfynings wat ‘n mens moet doen en die markte skuif natuurlik ook so vinnig, veral na die wêreldkrisis in die finansiële markte moes ons baie aanpassings maak rondom werksmetodes en so meer en weet waarna die ouens soek. Mens leer maar die hele tyd. Dis hoekom dit ‘n verhouding moet wees wat beide kante toe werk.

 5. Wat is die grootste besigheidsfout wat jy tot dusver gemaak het?

Dis ‘n lekker vraag, ek is ‘n entrepreneur, so ek het van kleintyd af al daar in die Kaap, toe ek nog sommer op skool was,  naweke klere verkoop op die treinstasie, of ek het altyd ‘n ding aan die gang gehad. In Klawer was ek sewe of agt jaar oud, toe staan ek al langs die pad en verkoop druiwe en vye uit ons tuin. Ek glo mens word as entrepreneur gebore, ek glo nie mens kan dit aanleer nie, want daar moet ‘n ingebore lus wees om ‘n transaksie te beklink. So, van die grootste foute wat ek gemaak het was maar hierdie inherente dryf om ‘n transaksie te wil doen. Ek het ‘n enorme houtbesigheid in Gaboen gehad, maar ek dink nie my vrou kon in ‘n stadium eers skoene koop nie, want al die spaargeldjies was opgebruik. So dit was ‘n groot fout

6. Dit sluit nou weereens mooi aan by die volgende vraag, jy kies jou kliënte versigtig, en dit gee jou ‘n groter kans tot suksesvolle dienslewering wat op sy beurt weer vir jou nuwe werk gaan inbring?

Presies! Ek sou dink die mense wat vir Andile werk is intelligent, en die soort mense wat hulleself oor tyd wil bewys, dis mense met ingewikkelde grade wat hulle bekom het, meer as een soort. Dis baie belangrik vir my dat my maatskappy aanhou wen, met ander woorde, ons moet aanhou goeie werk lewer, konsekwent wees en gedurig aflewer sodat ons die heeltyd intern onderstreep van dís wat ons doen, dís waarin ons goed is en dís hoekom dit lekker is, want ons wen en ons maak ‘n sukses. Sukses bou sukses.

 7. Wat is tans of histories ‘n groot pyn in die besigheid?

Ons as besigheidsmense het mos maar altyd illusies van hoe ons die ding wil laat groei, en dan  teen ‘n duisend persent laat groei en so aan. Maar ons kan nie, want ons kan nie ons produktiwiteit na hartelus opjaag nie. Dit neem ons geweldig baie tyd om mense op te lei. Ek sê altyd ons kry baie keer slim jong mense wat vir ons wil kom werk, dan het hulle sê nou maar ‘n ingenieursgraad gedoen en ‘n honneurs in finansiële wiskunde of so. My boodskap aan hulle is altyd: “Ons gaan jou afbreek; vir twee jaar gaan jy in ‘n loopgraaf sit en die harde werk doen.” Dit is wat werk, dis hoe ons mense kry om werklik te verstaan van onder af boontoe, en dan is hulle op hulle beste as hulle daar uitkom. So dis die grootste pyn, dit vat maar tyd, dis ‘n moeilike ding om op skaal te kry as mens gulsig raak – en ons het dit al ‘n paar keer gesien met ouens wat te vinnig wil groei en te veel werk aanpak. Dis dan wanneer jou kwaliteit afneem en dan is die einde in sig, want dis eintlik ‘n klein gemeenskap wêreldwyd waar almal maar praat. Die grootste pyn is definitief maar die tempo waarteen ‘n mens kan groei in spesifiek die professionele dienste-aspekte van ons besigheid.

Hoe kan die Klipkouers met jou kontak maak?

Hulle kan na ons webwerf toe gaan, www.andile.net, of hulle kan my e-pos by [email protected]

NB! Onthou om na Andries Brink as mens se onderhoud te luister.

Back To Top